رضوان الیون نے تاریخی ایڈیلیڈ کرکٹ گراؤنڈ میں دوسرا ون ڈے جیت کر تاریخ رقم کر دی۔دوسرے ون ڈے میچ میں پاکستان نے آسٹریلیا کو شکست دے کر سیریز 1-1 سے برابر کردی جب کہ وہ ایڈیلیڈ کے تاریخی گراؤنڈ پر 28 سال بعد پہلا ون ڈے میچ بھی جیتنے میں کامیاب رہا۔پاکستان نے ٹاس جیت کر پہلے فیلڈنگ کا فیصلہ کیا جسے بولرز نے درست ثابت کیا۔ حارث رؤف نے جارحانہ بولنگ کا مظاہرہ کیا اور 8 اوورز میں 29 رنز دے کر 5 وکٹیں حاصل کیں۔گرین شرٹس کے باؤلرز نے شاندار باؤلنگ کا مظاہرہ کرتے ہوئے آسٹریلیا کو 163 رنز تک محدود کر دیا۔دونوں ٹیمیں اس گراؤنڈ میں 8 بار آمنے سامنے ہو چکی ہیں جب کہ کینگروز نے 7 بار فتح حاصل کی۔ایڈیلیڈ میں 28 سال قبل 1996 میں پاکستان کو واحد جیت ملی تھی، اس وقت قومی ٹیم کی قیادت وسیم اکرم کو سونپی گئی تھی اور اس میچ میں ثقلین مشتاق نے 5 وکٹیں لے کر فتح میں اہم کردار ادا کیا تھا۔
